لا اعلم لماذا فعلت ذلك ؟؟ حيث ان تلك الاشياء تصبح خاصة لدا البعض ... ولدى ... ولكن لماذا انشرها على الملأ ؟ .... حيث ان احلامى وكوابيسى ...شىء منى ... يخصنى انا ... ولا يخص شخص اخر سوى انا ...
الحكاية بدات معايا لما كان اخويا فى الثانوية العامة .... وكان يوم النتيجة بتاعته وعلى ايامهم مكنش فى انترنت كان لازم تروح تستلم النتيجة من المدرسة .... صحيت الصبح بدور على امى .... لاقيتها فى المطبخ .... بقولها ابنك هيجيب حاجة و 80% .... قالتى اخرس !!! متفولش على اخوك ... قولتها انا مش بفول .... انا حلمت بكدا !!!
وبعدها بساعات .... كان اخويا جاى ... ومعاه الشهادة .... وامى بتساله انت جبت كام قالها على المجموع ..... وطلع المجموع حاجة و 80%
لما سمعته ... حسيت انى مكشوف عنى الحجاب و " اللحاف" وانى حاجة محصلتش ... بس للاسف فرحتى انتهت بعلقة من امى ... عشان قالتى انت اللى فولت على اخوك ... وخليته يجيب المجموع دا .
طبعا انا نسيت الموضوع دا... بس كان كل شوية ... يحصل موقف ... اقول انا شوفت الموقف دا قبل كدا ... وابقى مش عارف انا شوفته فيه ؟؟ بس حاسس انى حلمت بيه ... لحد من حوالى 3 سنين قررت انى اكتب احلامى على ورق .
يعنى قبل ما انام كنت احط أجندة وقلم جنب السرير .... اول ما اصحى من النوم .... اروح كاتب اللى حلمته وبالتاريخ .... ولما يحصل موقف انا حسيت انى شوفته قبل كدا ... ارجع للى انا كتبته من الاحلام .
وكنت لما برجع للى انا كتبته من احلام ... احس بحاجات غريبة قوى ... واقول يااااااااااه ... معقول انا حلمت بكدا ... معقول دا حصل فى الحلم... وساعة لما كنت اقرا الاحلام دى ... كنت احس اد ايه انا مبسوط... مش عارف ليه ... مع انى كنت اللى بعمله انى اقرا بس... مجرد قرايه بس للاحلام اللى انا كتبتها.... لحد اخر مرة كانت يوم الخميس اللى قبل ماتش مصر والجزائر فى تصفيات كأس العالم ... حلمت ان الجزائر غلبت مصر 1- صفر ... وكان الماتش يوم السبت .... وانا بقول هو يا ترى الحلم ممكن يتحقق لكن .... والحمد لله مصر غلبت 2- صفر ... وقالوا ان هيبقى فى ماتش فى السودان يوم الاربعاء ... وجه يوم الاربعاء وكان الماتش الاسود .... والجزائر جابت جون ... انا افتكرت الحلم بتاع 1 – صفر وعمال اقول يا رب الكابوس دا ما يحصل .... لكن الماتش خلص 1- صفر للجزائر .... من ساعتها وانا بكره النوم .. وبكره الاحلام .. وقررت انى اكتب الاحلام اللى احس انها ينفع تتكتب ... وطبعا مش كله ينفع يتكتب ... لكن اهو الواحد يجرب يكتب الحاجات اللى بيحلمها ... يمكن تكون هلاوس واى كلام ... وممكن برضوا تكون حاجات تخلى الواحد يشوف الخطوة قبل ما يخطيها ... ويعرف هو فين ... ويا رب تبقى كلها احلام ... من غير كوابيس .
0 التعليقات:
إرسال تعليق